Udhëzues Praktik për punën e Këshilltarëve për Karrierë (KK) në Institucionet e Arsimit dhe Aftësimit Profesional (IAAP)

Transformimet e shpejta ekonomike, teknologjike dhe shoqërore, automatizimi, digjitalizimi, zhvillimi i ekonomisë së gjelbër dhe profesionet e reja, po e ndryshojnë vazhdimisht mënyrën se si individët e ndërtojnë karrierën e tyre. Për këtë arsye, orientimi në karrierë nuk konsiderohet më thjesht si një shërbim informues për zgjedhjen e një profesioni të vetëm, por si një proces i vazhdueshëm, i njohur ndërkombëtarisht si “orientim gjatë gjithë jetës” (Lifelong Guidance), që i fuqizon individët t’i zhvillojnë Kompetencat për Menaxhimin e Karrierës (Career Management
Skills, CMS): ta njohin veten, t’i eksplorojnë mundësitë, të marrin vendime të informuara dhe t’i përballojnë tranzicionet e vazhdueshme të jetës profesionale. Këtë qasje e promovojnë organizatat ndërkombëtare si European Training Foundation (ETF), CEDEFOP, UNESCO, Organizata Ndërkombëtare e Punës (ILO) dhe OECD, dhe sot ajo përbën komponent thelbësor të sistemeve moderne të arsimit, aftësimit profesional dhe punësimit në Evropë.